د بریتانیا پخوانی شهزاده انډریو له دولتي دندې څخه د ناوړه استفادې په شک نیول شوی دی

د اسوشیټډ پرېس او بي‌بي‌سي د راپورونو له مخې، د بریتانیا پخوانی شهزاده انډریو د فېبرورۍ په ۱۹ نېټه له عامه دندې څخه د ناوړه استفادې په شک ونیول شو.

واشنګټن پوسټ ورځپانې خبر ورکړی چې د  تمېس وېلې د پولیسو په اعلامیه کې ویل شوي چې د نورفولک ولایت یو سړی چې عمر یې له شپېتو کلونو پورته دی نیول شوی او پلټنې روانې دي. پولیسو ویلي نوموړی اوس هم په توقیف کې دی.

مرستیال لوی قومندان اولیور رایت په بیان کې وویل:

"د بشپړې ارزونې وروسته، موږ د عامه دندې د ناوړه استفادې د دې ادعا په اړه رسمي پلټنې پیل کړې دي. موږ پوهېږو چې دا قضیه د خلکو لپاره مهمه ده، او په مناسب وخت کې به نور معلومات شریک کړو."

پولیسو د ملي لارښوونو له مخې د نیول شوي کس نوم په رسمي بیان کې نه دی یاد کړی، خو د اسوشیټډ پرېس او بي‌بي‌سي په وینا، نیول شوی کس اندرو ماونټبېټن-وېنډزر دی.

اندرو، چې د بریتانیا د پاچا چارلس دریم ورور دی، تېر کال له جېفري اپسټین سره د اړیکو له امله له خپلو شاهي لقبونو بې‌برخې شوی و خو نوموړي تل هر ډول ناسم کار رد کړی دی.