اسرایلو د لبنان لپاره له ۱۰ ورځني اوربند سره موافقه وکړه

واشنګټن پوسټ خبر ورکړی، چې د اسرائیل لومړي وزیر بنیامین نتانیاهو د پنجشنبې په ورځ ویلي چې اسرائیل په لبنان کې له ۱۰ ورځني اوربند سره موافقه کړې، وروسته له هغې چې ولسمشر ډانالډ ټرمپ دا وقفه اعلان کړه.

حزب‌الله، هغه لبنانی ډله چې له اسرائیل سره جګړه کوي، ونه ویل چې آیا دا تړون به ومني که نه.

دې ډلې وویل: "اوربند کې باید په ټوله لبناني خاوره کې د بریدونو بشپړ درول شامل کړي، د اسرائیلي ځواکونو د تګ راتګ ازادي نه وي، او حالت بېرته د مارچ له ۲ څخه مخکې ته راوګرځول شي."

دا اعلان په داسې وخت کې وشو چې په سیمه کې پراخې هڅې روانې دي تر څو د ایران جګړه پای ته ورسېږي، او امریکايي او ایراني مذاکره کوونکي لا هم پیغامونه تبادله کوي، خو لا یې د دوهم پړاو خبرو موافقه نه ده کړې.

د ټرمپ ادارې په وروستیو ورځو کې پر اسرائیل او لبنان فشار زیات کړی و تر څو اوربند ته غاړه کېږدي، ځکه هلته دوامداره جګړه له ایران سره اوربند له خطر سره مخ کاوه.

حزب‌الله له ایران سره نږدې اړیکې لري او د ایران د مشر علي خامنه‌ يي تر وژل کېدو وروسته یې پر اسرائیل بریدونه بیا پیل کړل، چې په ځواب کې اسرائیل پراخ بریدونه وکړل.

اسرائیل ټینګار کړی و چې لبنان او حزب‌الله د دې میاشتې په پیل کې اعلان شوي اوربند کې شامل نه دي، خو ایران او پاکستان له دې سره مخالفت کړی و.

ټرمپ وویل چې اسرائیل او لبنان "موافقه کړې چې د سولې لپاره به په رسمي ډول د ۱۰ ورځني اوربند پیل وکړي."

د ټرمپ اعلان وروسته له هغې وشو چې هغه د پنجشنبې په ورځ د لبنان له ولسمشر جوزف عون سره خبرې وکړې، او د هغه د دفتر له مخې، ټرمپ د اوربند د ژر عملي کولو ژمنه وکړه.

د لبنان د ولسمشر دفتر وویل چې عون د امریکا د بهرنیو چارو وزیر مارکو روبیو سره هم خبرې کړې، او هغه د اوربند د ترلاسه کولو لپاره د هڅو دوام تایید کړ.

اسرائیل او حزب‌الله له ۲۰۲۳ کال راهیسې جګړه کوي. د اسرائیل هوايي بریدونو د لبنان په جنوب کې ډېر کلي ویجاړ کړي او د بیروت جنوبي سیمې یې سختې زیانمنې کړې دي.

اسرائیلي ځمکني ځواکونه هم لبنان ته ننوتي او د پولې په اوږدو کې یې شاوخوا ۱۸ میله سیمه نیولې ده.

په ۲۰۲۴ نومبر کې دواړو خواوو اوربند کړی و، خو وروسته بیا جګړه د مارچ په پیل کې بېرته پیل شوه.

له هغه راهیسې، د لبنان د روغتیا وزارت وایي چې له ۲۱۰۰ څخه زیات کسان وژل شوي، چې ۱۷۲ ماشومان هم پکې شامل دي.

په داسې حال کې چې له ایران سره خبرې روانې دي، د ټرمپ اداره لا هم ګواښ کوي چې که خبرې ناکامې شي، جګړه به بېرته پیل شي.

د دفاع وزیر وویل چې امریکا "له مخکې څخه هم په ډېر ځواک سره چمتو ده" او که اړتیا وي، پر مهمو هدفونو به برید وکړي.

هغه وویل چې د سمندري بندیز عملي کول "یو نرم انتخاب" دی، چې امریکايي بېړۍ او الوتکې د ایران بندرونو ته تلونکي او راتلونکي ټانکرونه دروي.

امریکايي چارواکو وویل چې تر اوسه ۱۳ بېړۍ بېرته ګرځېدلې دي او هېڅ یوه بندیز نه دی مات کړی.